Калыханка. Яноцік Цёма

Опубликовано 6 мая 2016, 11:53

Калыханка” зноў рыхтуе для сваіх маленькіх гледачоў цікавы сюрпрыз.

Хутка да любімых усімі мядзведзіка Топы, лісічкі Яны і Бусліка далучыцца новы лялечны герой – яноцік Цёма. Вялікі выдумшчык і вынаходнік! Ён ні дня не можа пражыць без займальных прыгод і эксперыментаў. У Цёмы нават ёсць сакрэтная лабараторыя, дзе ён праводзіць свае даследаванні і прыдумляе нешта. А яшчэ яноцік вельмі любіць прыхапіць чыюсьці рэч і папаласкаць яе ў вадзе – а што, нічога ж страшнага, калі ён трохі намочыць Топаў тэлефон ці Янчын чаравік… Або перапалохае ўсіх навіной, што сонца крыху “пахудзела” – ад яго адваліўся вялізны кавалак і ляціць проста на зямлю… Калыханачныя героі ўпарта не жадаюць змірыцца з жартамі маленькага свавольніка. Але з яноцікам не так лёгка справіцца! Аднак не будзем пакуль раскрываць усе сакрэты. З нецярпеннем чакаем сустрэчы з новым жыхаром “Калыханкі” 17 мая ў 20:40 на тэлеканале “Беларусь 3”!